مافيش فايدة
مافيش فايدة
و لا فيه شىء بيتغير
بنحكم قبل ما نفكر
و بالأحساس بنستهتر
كتير على بعضنا بنغدر
و بنقول كنا بنهزر
مافيش فايدة
و لا فيه شىء بيتغير
بنرمى بلانا فى الشارع
و غيرنا لسرنا سامع
ضعيفنا الكل فيه طامع
و للخير لسه بنمانع
مافيش فايدة
و لا فيه شىء بيتغير
بقينا بنشقى و بننحت
و لقمة عيشنا بتموت
لا بنسامح ولا نفوت
و لا بنشكى و لا بنسكت
مافيش فايدة
و لا فيه شىء بيتغير
صديقنا و عدونا واحد
و أخيّرنا بقى الفاسد
و بنكابر و بنعاند
و لا بنصبر و لا نجاهد
مافيش فايدة
و لا فيه شىء بيتغير
فى ضحكتنا البكى يسرى
و بتفوت الحياه بدرى
لفين هتاخدنى يا عمرى
و أيه متخبى يا قدرى
مافيش فايدة
و لا فيه شىء بيتغير
ملكنا الرعب و فزعنا
و وحش الخوف بيوجعنا
و لا نِسينا و لا فجعنا
و آيه من الموت هيمنعنا
مافيش فايدة
و لا فيه شىء بيتغير
بنسرق قومنا من نومنا
و نرمى همومنا لهمومنا
تزيد الضلمه فى غيومنا
و يكتم حزننا كلامنا
ليست هناك تعليقات:
إرسال تعليق