قشايه
مهاود فيكي يا دنيا
و متعلق بقشايه
و أقول الآه ترديها
تغطيها بضحكايه
يا حلوه بس مش دايمه
يا نايمه في ضي سهرايه
يا وخداني و سيباني
بعيده و ساكنه جوايا
بخاف أجري
عشان خاطري
تهدي الخطوه في خطايا
مانيش مالكك , لكن سالكك
يا سالكه المرّ لحشايا
في نوم يِغلب و بتقلب
و بحلم بس بعشايا
و بغرق من زمان فيكي
و أعود و العمر ويايا
و بهرب فيكي من يأسي
و ألاقي اليأس مرسايا
وأخاف مِنك علي نفسي
و بسكن خوفي ضلايه
أنا شايف و مش شايف
و عايش ضلمتي حكايه
هتخلص أمتي مش عارف
و لا عارف لها نهايه
و بفرح بالقليل فيها
و برفع دمعتي رايه
و إيه يعني حزين عايش
و دمعه بتروي دمعايه
و سكه تجرنا لسكه
و قهر يجر ضحكايه
أنا أسمي علي رسمي
مواطن فيها بشقايا
و بكره في الغروب أمسي
يقولو عني كان آيه
و بعد العيد هيسلوني
بصحبه و يا قمرايه
مهاود بس مش عابد
لغير الرب مولايا
ليست هناك تعليقات:
إرسال تعليق