مناجاة مع الله
أنا اللي متشعبط
بحبل الأمل
و أنا اللي هارب
من ركود الملل
و أنا اللي مِتحمل
و واقف جبل
و برتوي بالعطش
, كأني جمل
و بَحتمي بالخِلا
, بخوف مُحتمل
و بهتدى بالله
, و أخشع بتقوى و عمل
و بدمعي بترجاه ,
و أمشى مع اللي سأل
بضعف أقول الله
و اقوي في صرح حِماه
و أدفي في برد المدى
لما ينولني رضاه
و أصفي مع الترتيل
و أمنح سجودي صلاه
و أحمل ذنوبي ذليل
و أدعي و أترجاه
يرحمني يوم ختمتى
و مقامي يبقي علاه
و ماكنش م اللي نساه
و اللي بماله انشغل
و أنا اللي مؤمن
و ابتليت بالمحن
قويني علي دنيتي
و ارحم ضعيف امتحن
و ارشدني في فطرتي
ببصيرة اللي اؤتمن
خلي الهدي سكتي
رجعني لو بالشجن
و احميني من زلتي
و اغفر لي من غير كلل
الشر صوته صدا
و الخير في قلبي بدا
و أنا بين إيدين رحمتك
طمعان في جنه و رضا
برجع بتوبه أكيد
و أبكي بندم و وعيد
و لذنبي تاني أعيد
و الرحمة منك أمل
قويني علي دنيتي
دي القلب بيك اكتمل
بالحب فيك بنطوى
قويني بيك يا قوي
ماتخلينيش مُلتوي
و لا من الضالين
تبقي المني و مقصدي
و أبقي الإيمان و الدين
و السجده شوق ف جبين
و الصوت خشوع و آنين
و الرحمة منك أمل
و الجنة للي إتقبل
ليست هناك تعليقات:
إرسال تعليق