عزيز عالدنيا
أنا المبتورة من دنيا
بها الأنسان بيتحول
يكون نفحه من الرحمن
يكون ببغان
يكون حيران
يكون تعبان و يتلون
و يتلولو
يقول الكدب و يأول
و يتعجب ما يتأدب
يِعيب عالناس و يتعيب
برىء لو حتى كان مذنب
و أسمه بالحياه مُتعب
نسى كان آيه من الأول
عزيز عالدنيا يا دني
نعيش فيكي الفرح ألوان
بقى الأنسان بلا إنسان
يبيع العقل بالهذيان
يجور عالصحة بالأدمان
يكدب قلبه بالنسيان
و يوهب نفسه للأحزان
و فاكر عمره هيطول
و أنا المقسومة
فى أيديه شعاع من نور
و فى التانيه حدود و جسور
و فى عينيه سؤال مكسور
لأمتى هنشترى دموعنا
هنقفل كل أوجاعنا
و لا هناخدها فى متاعنا
نسيبها تدوب فى سرايرنا
ولا نسيبها تشيعنا
و تبقى حياتنا شىء مُخذل
و أنا المحرومة من الفرحة
و بسمة حلوة شفافة
بقيت تمثال من الأهوال
بقيت أغلال
بقيت أطلال
بقيت من نفسى خوافه
و بستنى
رغم دى كله بستنى
و رغم الدمع بتمنى
و بغزل من البكى مغنى
أقول قربت أهه أوصل
و ألاقي طريقي يتتني
و أيه فى الدنيا يستاهل
بكانا و حزننا الهايل
شريد فى الدنيا راح ينعى
آلامه و حظه للمايل
لاقاه زيه و من ريه
شرب و أتهد و إتخايل
غريبة يا دنيا ليه إنتى ؟
همومك كلها مسائل
لكن الحل لا يعُقل
ليست هناك تعليقات:
إرسال تعليق