السبت، 2 يوليو 2022

في عيد الحب

 في عيد الحب ❤ بكتبلك عشان

كلام ممكن يقع مني

صحيح الكل حاسدني عليك يمكن

لكن مخدوش وجع عني

في عيد الحب❤ ورد أحمر

قلوب بلالين و شمس و ليل

و زرع أخضر

و عمر إزرق مستنظر

حنان و حنين

و يوم في العام

و أنا بسرق إليك أعوام

و شوف دول كام

زمن عدّي و سنين قدّام

و برد مدوبوش ورده

و ثلج في روحنا م الأيام

في عيد الحب❤

مستنظرني ليه أفرح

عشان تبقي تمام عاشق

و شب هُمام

كما الأفلام

كما العنتر في إيده زِمام

و عبله الدايبه مش داريه 

هيعشق كام ؟

زهور روحي مكفتهاش زهور الأرض

لو تجني

بلاش تجني

كفايه جنتني بالأوهام

كلام في كلام

وجع في خصام

و هجر ظلام

و بعد و فرقه مش فارق

هنبعد كام ؟

و قطر يفوت و يهجر عمري قدامك 

كما الورده اللي حاضنها

هتدبل يوم

و تبقي تحت أقدامك

و يبقي بعادك الجاني كما وجودك

كما وعودك

كما ورودك في عيد الحب❤

في عيد الحب شفت الزحمه و العشاق

و كان في عيونهم الفرحه

كما الأحباب

و شفت العاشق الكداب

عرفت إذاي أفرقهم

و أعرف مين أصدقهم

و أعلمهم و أفوقهم

و أقول دا سراب

عرفت الحق بضلالك

معشتش ظل بظلالك

و لا استوصلت بوصالك

و لا اتحنيت من الفرحه

و لا جفت دموع عيني

في عيد الحب❤

و جالك قلب قوللي إذاي تجيب لي زهور ؟

مشفتش زور ؟

أكيد مفتون، أكيد مجنون

او إنت العاشق المأجور

أنا مش حور

و ديه الأرض مش جنه

و قلبي بإيدك استفني 

و لا بيحلم و لا غني

و عن أشواقك استغني

و مش عايز كمان بلالين 

و لا أزهار 

و لا دباديب

في عيد الحب❤

و جمّع كل عشاقك

كما المالك مع جواريه

فتوه و ماشي بين حواريه

و سيبني بقلبي ابكي عليه

عشان اداويه

عشان اداريه

و أحايل فيه يسامحني 

و يمنحني زمن تاني

بلا عيونك

في عيد الحب❤

ليست هناك تعليقات:

إرسال تعليق