الغشاش
.........
.
.
.
و هاتي من زمن تاني بشر تاني
و غير شكل عنواني
و لون الحلم و حيطاني
و هاتي بيبان
كمان النسيان
كما العصيان في أحزاني
و نسي الورد تباشيره
و خد م الوجد تعابيره
و هات م العمر تقديره
و جايز يوم ساعتها أعود
كما الأول
و ادواوي الفرح و أتبدل
أو أتأمل، و أكمل هدم بنياني
و جيب لي سنين
و تملاها كمان أفراح
و تدفعلي تمن ضحكه
فديتها جراح
و ترجملي حالات روحي
عشان أرتاح
عشان ارجع كما الأول
لازمني علاج و عمليات
و لازمني كتير اوي اوقات
كما عمري اللي ضاع في سُكات
و نام في سُبات
و خدني و هات
بدالي دفترين أوراق
كما الترياق
و سطر صفحة الأشواق
و شخبطها
و دون دمعة الأحداق
و سَكتها
و عرّف روحي سِكتها
و محبتها
أو احبطها
متفرقنيش،
عشان صبحت متعرفنيش
بطبيعتها و طبعتها
و جِلدتها اللي جَلَدتها
مسامحتنيش،
سماح يعني
عشان مبقتش عارفه أعود
و اكون لك جود
و اكحلك لك عيوني السود
و لا ارسملك مواعيدي و تنهيدي
و انا مفقود
سماح لو فيك سمع لسه
و صدقني
منيش حسّه
و لا بأحزان و لا بأفراح
و لا بلمسه و لا بهمسه
بريئة من غرام و وعود
و بتبدل
و لا بإيدي بنيت حبك
لكن بإيديك بموت جمبك
و شقيت الجروح فيه
و ياما شالتني رجليه
و دلوقتي، أنا اتهديت
و بستبسل
و بتذكر و بسترسل
و برسل لك مراسيلي
عشان توصل، و تفهمها
حياتي جيتها توهمها
جنيت أيامي طفيتها
و عشت العمر انورها
و أقومها
عشان ارجع لازمني طريق
متعرفهوش
لقلب إنقاد بالف حريق
بقي مغشوش
و سكه لضحكه لو فكه
و أمل منقوش
و ناس بيضا كما كنا
و مش بوشوش
عيون صافيه تكون جنه
بوفا و عروش
مشاعر حب دوبنا
مكنشي فاشوش
عشان ارجع كما الأول
لازمني عمر يتبدل
بطعم و لون و بر و بحر
و كون و حدود مداها حر
و اكون في جنون و جذب
و سحر
و أحاول القي نور الفجر
عشان ارجع متستناش
و لا تنساش
صريع الحب، ما بيهداش
و جارح فيها، مابيسواش
فمتلومناش
و مهما بعدنا متجيلناش
متعرفناش
وداع للخادع الغشاش
.
مها ضرار
.
#ديوان_العرب_للنشر_والتوزيع
ليست هناك تعليقات:
إرسال تعليق