متخافيش م الموت يا دره
انتي حره
بين قلوبنا تطوفي ثوره
و ف جنان الخلد طايره
و ف قوافينا الكسيحه
المستباح الدم فيها
غرس شجره
تطرحي بكره السواعد
يتولد فينا المجاهد
تسري بعروقنا الشدايد
مش كلام و خلاص نقوله
هد فينا القول حَكَايا
و الحِكايه
وعد بلفور م البدايه
وعد كلب لكلب زيه
كام شهيد و ميدان و صرخه
كام وطن منبوح بيبكي
و الشجر في الأرض ينطق
اقتلوا الصهيون ورايا
و انتي كنتي عيوننا فيهم
مش خطأ و لا جت دي صدفه
حرب بارده
في نفس شاره
حرب فينا من الغوايه
و الفتن و معاني جاحده
و كنتي ورده
وسط بحر من المهالك
انتي عشتي
و مات بدالك
كل حاجه
انتي مش محتاجه لينا
كلنا الضالين
فِدا لِك
كلنا الغايبين في توهه
نبكي حبه
و بكره نرجع تاني نسأل
إنت أهلي أو زمالك
متخافيش م الموت يا حره
انتي دره
و احنا لسه عبيد دماغهم
تحت نابهم
ناكل اللقمه بجنابهم
نشرب العتمه بمزاجهم
يسكنوا بيوتنا العتيقه
يحبسوا الأحلام في ضيقه
يسحلونا في قلب اقصانا المجيد
لو نصلي أو نقول الله أكبر
يحفروا ،و يضللونا بمية طريق
و يخنقونا أكتر و أكتر
و أما نكبر حبه ننسي
حبه حبه
احنا مش احرار
و ده مسموش سلام
دي مقامره
و الضحيه انتي يا طاهره
و كام شهيد عاش فينا شاهد
و المشاهد
كلها واضحه و باينه
بس نقرا
ليست هناك تعليقات:
إرسال تعليق