قالوا العجب
_________
قالوا العجب، و قالوا لنا مهرجانات
و لقيت ولاد و بنات، بتستهبل
و شتيمه دايره و عادوا في الحوارات
عابوا الحارات، فسدوا اللي كان عيل
هِدّ بغُناك الباطل اللي ما مات
و إن كنت مش راجل ، هتسترجل
أصل اللي قالوا قبلنا حكايات
ماتوا و حكاياهم بتتسلسل
من جيل لجيل، من عهد و لّي و فات
و هتكبر الأجيال، و هنكمل
الفن قمه، و رغم أنف حاجات
هتموت و تفني، و صوتنا راح يوصل
.....
يا سامعي، اسمع و قول الله
أجمل ما في الإنسان صدي صوته
عصفور يطير محبسش مره مداه
و سما و براح، و الأرض مش بيته
عاش الغنا، للي نداه و اداه
و اللي عداه، هيدوب في تخبيطه
(حلو الكلام ) يا خلق مين ينساه
و العيب يقوله خسيس و هنفوته
راح الرخيص لرخيص يقول وياه
و العالي غالي بأصله و بِصيته
سامعين معايا الكلمه بتقول آآآه
إيدكم معايا طالما بصيتوا
.........
قول يا نغم، يا فن مين عَرَّاك ؟
شفنا اِعْتراك و شِباك علي دماغنا
بَصينا م الشباك، دموع و هلاك
و كلام يحط أساسها علي داغنا
عيب الكلام ده كله يا فتاك
مش لَتّ للوسواس، ده دي مغني
الكلمه رحله جميله مش أشواك
عن كل معني أصيل، ليه تستغني
أكتب كمال لأبني اللي جاي معاك
وحل الكلام وياك ممردغنا
صحينا من ده كابوس، تراب و بلاك
عايزين نعود بالحب نتغني
......
بنده عليكي، يا مصر يا أم الكرم
جودي علينا بثومه و لا فريد
عيل عبيط عمال يقول أنا هرم
و لا يعرف المغني و لا التغريد
يا ام العواجز راضي باللي انصرم
شُقِّي لي كل جميل مع التجديد
بحرك مديد و عديد و منذ القِدم
بتمدّي إيد قبل أما ترجع إيد
ببكي علي اللي صار بحسره و ألم
ماسك إيديكي، أوعي تسيبيني وحيد
مستني مولودك يا ام النِعَم
و عشمت فيكي، و عشمي جاي أكيد
........
يا مُنشدي، سَلِّم و سالمنا
لا تغني تاني، و لا تقول أشعار
خلص الكلام، لا تقول و تألمنا
لا تروح في سكة مَغْني، و لا مشوار
عوضك علي الله، اللي قسّمنا
مبكاش نصيبه الشوك مع الأزهار
اسمع سماعنا، لو هتكرمنا
و بلاها فنّ العاركه، و لا الزار
و أمانه متغنيش، و تقسمنا
الربع طيب، و الكتير أشرار
طل العبير بربيع مواسمنا
و اتهدّ برا عنَّا، يا إعصار
