توت توت
إحنا بتوع القطر يفوت
عالغلبان أو عالهلفوت
سلم أمرك قول توت توت
سوق بينا يللا يا قطر الموت
يركب فيك أغنام و مواشى
و بشر من غير أي نياشى
أو بنى أدمين كده عالماشى
و اللي معاه الحظ مجاشى
فاته القطر و فات من الموت
توت توت
دي اللي خرج يسعى على القوت
و اللي سرح ويا الملكوت
كله إندق و نام في تابوت
بين قضبانك ياما إنداسنا
عجلك ياما هلكنا هرسنا
مره بتشطح مره بتولع
مره بتهلك و بتدهسنا
مره بتشتاق حضن أصحابك
و بتتقابلوا بتقطيع روسنا
و بتتباهى بقهر نفوسنا
و دايما وقتك مش مظبوط
توت توت
فوق سطحك طار ياما رقاب
و ياما فرقت كتير أحباب
و زرعت لنا بروحنا عذاب
وتبص لنا و بإستعجاب
شوف نفسك يا بطىء ياهباب
أخرك تمشى فى بركه و غاب
يا مقطقط قوى يا ظغنتوت
توت توت
لساك برده أليم سفاح
ياللى الدم غِذاك ومباح
أنامن رأيى تروح ترتاح
عند بتاع خرده و نرتاح
و كفاية بقى ضبط و أصلاح
ياللى ميلادك مع رمسيس
مش هيفيد و ياك جراح
و دواك بس معاش و تابوت
ليست هناك تعليقات:
إرسال تعليق