دموعنا غِنا
ماذا عن الدمعة
و دموعنا غِنا
يا خالق الدمعات
كمان ابكِنا
أسوأ ما في الدمعات
صدي حبسها
و أسوأ ما ف المال
كان فجور الغِني
و إن يوم حبست دموع
تطق تموت
دي ساعات تكون الصرخة
نعمه و قوت
عالم جنان
عايز كمان يكبتك
كن بغبغان
ردد بكاك
و يفوت
و امسح دموعك
و اصحي من غير كلل
ساعات بذور الدمع تطرح امل
و ساعات ممات العزم
بعد الندم
بيكون دواه الحزن في الملكوت
متخافش من الاوجاع
و من سِرَّها
الدمع بيطفي
جوي حرها
و الأفئدة متعودة ع الألم
و نفوسنا و دموعنا
كلام حزنها
ماذا عن الدمعة
و ما بعدها
الحكمة مش سامعه
سكوت حسها
فيه دموع تخبي نفسها ف حيطان
و دموع علي الشط الحزين شطها
و دموع تتجمد و ترقد لهب
خافت تبوح
قدام عيون جرحنا
ماذا عن الدمعة
و دموعنا غِنا
و دموع متلقاش الحبايب هنا
و يدوب حبايب كانوا مش من هنا
و دموع تلاقي دموع
سوا يغرقوا
و من الفرح يسرقوا
و يسترزقوا
و يعيشوا قد ما عاشوا
ذكري و فِنا
ماذا عن الدمعة
و دموعنا غِنا
يوم تتولد، تبكي
و دمعك يفيص
يوم تنجرح،
يتسد حلمك بعيد
يوم تفترق
تتهد من شوق يزيد
يوم تتظلم
ترتد للشوك وحيد
يا تأمن الدنيا و جوي حرها
يا بالبكا تغسل
كجود السما
لما بيهدى الزهر للأفدنة
ماذا عن الدمعة
و دموعنا غنا
حتي اللي مِنَّك قادوا فيك الوجع
تقولش دود يا جدع، أكل لحمنا
يهدوك حياه، يهدوك نغم
يهدوك سلام
يهدوك كلام، يهدوك ملام
يهدوك سهام
و يمددوك علي اسطح الأزمنة
مسنتين الدمعة يوم موعدك
قطفوا الزهور و استغربوا الاشواك
فقدوا الضمير و المعني
و الأمكنه
ماذا عن الدمعة
و دموعنا غِنا
ماذا عن الروح، اللي ما قصرت
و اللي بكت م الصعب، و اتكدرت
و اللي انطفت، من بعد ما نورت
حضنت دواها م الدموع و ارتوت
يا سلسبيل الحي
يا ممكنه
ماذا عن الدمعة
و دموعنا غِنا
يا خالق الدمعة ،
كمان أبكنا
شعر/ مها ضرار
ليست هناك تعليقات:
إرسال تعليق