في دنيا

في دنيا كلها منزل
فيه ناس عن ناس بتستاهل
و ناس من ناس بتتساهل
و ناس بأحبابها بتضحي
و تتباعد و تتشاغل

و خلق بخلق ملهيه
و خلق بخلق منسيه
و دنيا كبيره و شقيه
تعلّي الواطي و السافل

حبايب كلهم كانوا
حبايب بس أهم هانوا
و خانوا و عاشوا بيعانوا
و راح الحب بالساهل

و مين جاب الفرح عندك
و مين طبطب علي خدك
و مين لملم وصال ودك
و مين عن وجعك إتشاغل

حبيبك كان بيستني
و جاب الكون إليك جنه
و كنت كتير بتتجني
و سبته في حيرته بيحايل

و صاحب كان مهوش جمبك
و مال ع اللي بأذي صدك
و سابك في الدروب وحدك
و كان قلبه قوي و كاحل

مصالح دايره تتصالح
و كسبان اللي عاش طايح
و كله في بعض بيناطح
و داب الود و اتنازل

قسوة التنهيده

عارف حبيبي قسوة التنهيده
خليتني وسط الناس, كأني وحيده
عالم غريب و الدنيا باهته, جديده
و أضحك و عمري ما كنت فيها سعيده
مين اللي قال إن المواني بعيده
و إني ف هواك البحر, مت شهيده
لسه الأماني في قلبي, زي ما هيه
يمكن تقول لو مره , جمله مفيده
صوتك صداه لساه بيترجاني
و ظنوني فيك لساها برده عنيده
أنا مش بلوم علي قلب بايع قلبي
مكنتش فيك يوم الأماني أكيده
أنا بس عايشه بوادي من أحلامي
يمكن تطيب , أو تبقي مره زهيده
فاتت سنين و سنين بقلبي العاصي
و أنا عشت بيه, مفقوده و لا فقيده
دمع العيون سايب و سابت روحي
من وجعي بببقي كأني حاجه فريده

كيف أنساك

كيف أنساك 
و أنت في شرياني
تسري بأنفاسي
و من وجداني
منك الهوي 
و النور و الطرقات
و منك تُسطر, بالدُنا أزماني
تحسو و تشدو الشوق من نفحاتي
و تذوب حبًا
مذ بدا بنياني
كيف أنساك حبيبي
إذ رآك القلب
تنثر بالثري عشقًا
و لن تنساني
و أنت أنت
كما آتيت حبيبيًا
و كما رحلت
القائمًا بكياني
و كما غدوت 
الساكنـًا بعيوني
و كما نطقت
العالقـًا بلساني
و كما رجوت 
دعائي المتفاني
و كما همست
الخمر في هذياني
كيف أنساك ؟
و أنت في أحلامي
كالكوكب الدري
في الدوران
و تموج في بحر
بلا أشرعتي
و تكاد تغرق
في الشتاء الثاني
يبكيك قلبي بينما تلقاه
و كأنه 
في واحة النسيان !
أخفيك سرًا
بينما أفشيت
للكون عن حبـًأ
رعاه حناني
و سقاه دمعـًا في الهوي, فبناه
فبدا كموج البحر و الشطئان
أخفيك سرًا
بينما أوجعني
قلبــًا بما أوجعته 
أشقاني
أخفيك سرًا
أنني راحلة
ماعادت الدنيا 
بطرف بناني
و الفجر لا يسري هنا
في رئتي
منذ ارتحلت
البور في أركاني
غير الحنين
سوي الأنين حبيبي
ما عاد شيئـًا 
غيرهم يلقاني
كيف أنساك و أنت في شرياني

يا رب يقدر

يا رب يقدر
يداري عني خيانته
و أفضل كده
مصدقه إنه كان
و متتحكيش قدامي تاني حكايته
و أنسي بقي , الدمع و الأحزان
متقعش صوره , و لا أشم أنا ريحته
و لا أشوف عينيه
مهزوز ضعيف و جبان
محتاجه أكمل ,
بس لسه أنا شايفه
قدام كتير منهم , يعود ولهان
مرجعش ليه,  رغم إني ياما منعته
يمكن عشان
جوايا أنا النقصان

1 * يا رب يقدر يداري عني عيونه
فيهم بشوف , حتي الأسامي كمان
يا رب قدرني إني أعيش له و أصونه
قويني علي نفسي و علي النسيان


2 * بيداري في سكوته اللي ساري حقيقته
لكني عارفه إنه مفوش إنسان
حتي ف همساته , بشوف أنا صورته
مهما رسمها , اللي خفاه بيبان

السر في طلعتك

السر في طلعتك
و لا ف بهي وجدك
و لا ف صفي بسمتك
و لا ف دفي خدك

البدر مال ناحيتك
و الليل علي شعرك
كل القلوب حبتك
و الشوق اليك وحدك

و أنا ماشي في سكتك
شايف علي ضيك
و الحلم لمحبتك
موصول بشوك وردك

1 * السر مين يعرفه
غير اللي حاسس بيه
يا لحن عمري أنا
و منايا أنا تغنيه
عشقك كمان الشجر
و الموج حدف أمانيه


2* السر إنك هنا
جمبي و فين ما تكون
ساكن بروحي أنا 
و كأني بيك مجنون
لو حتي بعد الفنا
هملا بهواك الكون

 3 * السر روحك كمان
ممكن يكون ف عنيك
لما تشوف الشتا
يطرح ربيع حواليك
أنا قلبي دايب و ده
لا بإيدي و لا بإيديك

4 * السر فيك الدوا
ترجع و روحي تطيب
و كأنه ليك الهوي
و النظره سر عجيب
ترياق وجودك شفا
و الصعب لما تغيب