ياللي من جنس الملوك
--------------------
ياللي من جنس الملوك
و الرعاع بيعظموك
مصر مش عزبة جنابك
و لا جبلاية أبوك
--------------
في الفلوس و الأرض ناهب
بس صاحب ذوق و واجب
شفت يوم نصاب يعاتب
تحس إنه كأنه أخوك
---------------
من باريس بتجيب ديلفري
ف الزحام تاخد و تجري
و إحنا وسط الطين بنهري
و أنت راكب ف الماكوك
-------------
الحبوب أقصي مشاكلك
و اللي فكر يوم يشاكلك
تاكله قبل ما يجي ياكلك
بس عايش ف الشكوك
---------------
ف السفوح و الجونه ساكن
و إحنا فينا المر كانن
و أما تيجي في يوم تماين
من دمانا يشربوك
--------------
و ف عزاكوا تجمعونا
و ف سروركم تكشحونا
قلنا هانت هتسيبونا
بس تاني بيندهوك
--------------
ليك سوابق , بس سابق
لمعوك وسط المفارق
بس واد حريف و حادق
م الجريمه بينحتوك
----------------
ياللي من جنس المعالي
ليك ليالي من الليالي
بس وقت الخوف تلالي
في الجحور بيهربوك
--------------
ياللي من جنس الملوك
و الرعاع بيعظموك
مصر مش عزبة جنابك
و لا جبلاية أبوك
ليست هناك تعليقات:
إرسال تعليق