عصفور كناري
عامية و أغاني
مها ضِرار
الإهداء
إلي من وهبهم لي ربي قبل أن أولد، إلي إخوتي أحبتي، وإلي اخت موسي و هارون، و إسماعيل و إسحق، و كل شركاء الروح و الدرب أهدي هذا الكتاب.
بسُرعَّه ع المدرسة
.
أنا شُفت مِنكم كل ألوانكم
الغدر و الفرقة مع التأويل
و ضِحكه صَفرا و زَهري بيكدكُم
و أزرق يا نَابكُم خَلّي قلبي عَليل
كان لونه أخضر بس بسَوادكم
بَقي دَمُّه مَلبن
و إنتوا قُلتوا تِقيل
و أحمر خدودكم
كان حجيم و انفجر
بركان غضب من ضِحكي
صُبح و لِيل
و بنفسجيه زهرة السُنبلة
فايح شَذاها
و عُمري فيها طَويل
كان قلبي مَهْما دِبل
و شَال عُمره
يِزداد شَغف
و عَبيره لِسَّه جَميل
و إِنتوا اللي فايح مِنُّكم سِمُّكُم
و ريحتكوا كدب و كُلكم أقاويل
و جِدال و شُغل عيال
و طِين أَرضُكم
و لا وَلِّفِت علي زرع
و لا مَحَاصيل
و لا خِير خَضارُّه
يِرِق فيه طَبعُكم
و لا نَبت سَارح
في الظلام قنديل
و الطين مَخدتوش منه
غير اللون
أمَّا البياض دا مَتِسْألوش عَنُّه
عِنده الغِنا و الذِّكري و المواويل
و الحِلم و النِّعمه و طِيب طَبْعِنَّا
و رباط بيجمع كل حب أصيل
و كفن حبايبي و قلبي شايلهم
و دموع بتسكن فيه زي السِّيل
و طيور مهاجره للسلام راحت
تركت وراها كل قلب بخيل
مش كل لون ترتاح له
تِرسم بيه
و لا كل لوحه بتترسم هتخيل؟
و آهي ناس بترسم ويا ناس ِتتْرِسِم
و الدنيا مَرْسَم للي ليها يميل
أما أنا فَخلاص تِرَكت الكون
و بَصَمت بالعَشره بإنِّي قتيل
و بإني في الجنة بعيد عَنُّكم
و لِنعمة النسيان بسِير ١٠٠ ميل
و ف لوحه فاضيه
و ف إيديه القلم
بَرْسِمْنِّي علي شوقي
بلا مَكاييل
و معَلِّماني الدنيا مليون ألم
بَرْسِم كويس
خَطِّي مش بيميل
و لا لِيَّه شوق
و الضَّعف عندي اِنْهَزَم
زَي الهَرَم وحده
عَتيق و تقِّيل
لا يزحزحوني الخلق عن كوني
لا يقَسِّموني و لا يِقيدوا لي فِتيل
و لا لِيَّه إيد تتمِسِك و لا تتلِوي
و ضَعفي مَات
و مَفيش لخوفي سَبيل
خدوا كل ألوانكم في شَنْطِتْكُم
و بسرعه علي المدرسة
بلاش تَعْيِيل
بليد
.
أنا ف المحبه بليد
معرفش أقول و أعيد
لكن في قلبي غرام
شمس النهار و حديد
و ف وسط كوم و زحام
بفضل أعاني شريد
و أصحي أشتهي وجودك
و إنتي بكل وريد
قلبي اللي مفقودك
عايش فداكي شهيد
فمَتزعليش مني
دا لإني بالتأكيد
قدام عنيكي بتوه
و بضيع و ببقي وحيد
و تجف أوتاري
و بتِخْتِفي التغاريد
و آلاقيني مش عارف
من ضعفي و التَسهيد
و مشاعري خنقاني
جوايا دايره تقيد
مبتنطفيش فيه
و لا ليها ماسكَّه و إيد
تِهرب لو اتكلم
تِجري لبعيد و بعيد
لو حَسَّه خَبِّيني
و كإني طِفل عَنِيد
حَاولي تِصالحيني
علي شوقي و التنهيد
سَجنوني ف ضلوعِي
و ف مَهْدِّي زي وليد
عايزك تجاوبيني
لو كان هَواكي أكيد
تِقري علي جبيني
اللي اِنكتب و مَزيد
و تشُوفي قُدَّامِك
بَحر و مَدي و مَواعيد
و تْقَسِّمي بشوقك
و كإني حِلم جديد
و تحَقَقِي شروقك
و القلب يبقي سَعيد
و أنا قلبي هَيصونك
يفرح كَإنك عيد
و يحِن لِجنونِك
مهما الجِنان هيزيد
مِستني أنا رَدِّك
إمضاء
حبيب و بليد
.
عَصْفور كَناري
عصفور كناري لكنِّي
من بلاد البُوم
و أحضن ناياتي و أغَنِّي
يرقصوا لي بشُوم
و يضَايفُّوا فيها المَواشي
و قلبي مش مَعْزوم
و يلومُّوا كل اللي ماشي
و مَنَعوا قلبي يلوم
عصفور
و أعْلِن ف سَاعة تَجَلِّي
موقفي بالضَبط
إكمني واضح تَمَلِّي
و أحب ضَبط و رَبط
كان يعني لازم أَعَبَّر
، و أعلِن إنِّي ف سَخْط
أهو آدِيني جت فيها رِجلي
وصِرت أنا المَشْئُّوم
عصفور
رَخَّص بضَاعتَك يا سيدي
و إنت بُكره تِبيع
و خَلِّي حَالك ف حَالتك
مُش ناقِصنَّا مُذيع
منتش فَرِيد راح تِغني
و لا طبيب مَواضيع
و قالوا ياما بتَأنِّي،
كلام مَالوهشِ لزوم
عصفور
طَب ما أنت لاَبِس لِباسك
و بتاكُلها بعِيش
و مِدَفِّي روحك بناسَك
و كفَاياك بتْعِيش
دَوَّر عَلي اللي مَقَاسَك
تِلْقَّي بالتَنبيش
و خَلِّي عَقْلك في راسَك
و قالوا خِف تِعُوم
عصفور
و أحضُن جِناحي بتأنِّي
و أَبْسِّطُه بالبَسْط
و أدْهِشنِّي لمَّا بَغَني،
و أنُط زَي البَط
يا خسَاره يا دنُيا فَنِّي
، و لِيه مَاليكي السَخط
دا القطر داسني و قَطَمني
و قُمت كالمقسوم
عصفور
و ساعات مَمِنيش فوايد،
و أهو زي ايها طور
و بدور في ساقيه و بزايد،
و عُمرِّي مش مَعْمُور
مَهْدود و من غير مَوارد،
و نَحِيل عايز دكتور
و ضَميري أَبيض و زَاهد،
بشكي بصوت مكتوم
عصفور
و آهوه نَتِفوه بَدْرِّي بَدْرِّي
صَابُه ف شَبابه العَجْز
و قَام من الصُّبح يجْرِّي
بيطِير، وقع م الجَز
قال مين هيُجْبُر لكَسْرِّي
الكُل ف جنَاحه هَز
قَهَروه بَقَي ف رُوحه يِهري
و جَت عَليه بهْمُوم
عصفور
عجبي عليك ياللي مني
تِسْبيني و أبقي مَشاع
و تعيش بتزرع ف ناري
و اللي خدته آهو ضاع
تِخْذِلنِّي صُبح و عَصَاري
تِكسر لي رُوح و دْرَاع
عِشت أشْتِري اللي عَاشِقهُم
و طِلعوا حِلم ف نُوم
عصفور
مَسْنود بروحك تَمَلِّي
تستني م الصُّبح نور
لو كنت مجروح بِتِغْلِّي
للحب ِتزرع بُذور
لما لَقوك شيء مُسلي
صَابهم بحبك غرور
و فضِلت فيهم تعلِّي
و سَكِنوك ف سموم
عصفور
عصفور كناري بيرقص
ويا كسر الضلع
لسَّاه ف روحه بيرعص
رَغم جَف الضِّرع
و من الحَدادي بيملُص
مش حَامِّيه الفَرع
يِخْلِص، و مهما بيخلص
دنيا فيه بِتْقُوم
عصفور
يا أعْرَّج
و إن شُفْت خَلق
بتِحسِدَك
يا أعرج بنُّص لِسان
ف اِعلَّم بإن الكون كَسِيح
و إنتَ الفَصِيح
و كمان
و إنت الصَرِيح ف الكَدَابِين
و إنتَ الوَحِيد
إنسان
يا أعرج
و إن عِشت لمَّا تعَلِّمَك
كل الشُقوق ع الوش
والدُنيا تَاخْدَّك تِرسِمَك
و بتِنْفِرِد و تكِش
و تقَعَدَك و تقَوِّمَك
و تِنْتِظِر بتْنِّش
فات المَعاد علي كل شيء
و ماعادش حتي أمان
يا أعرج
قدام مِراية حُسنها
تِتبَدِل الأَشْكَال
الدُنيا مانتَش قدَّها
بتدُّور يمين و شمال
بتغيب عليك
مع إنها
واخداك علي اِستِعْجال
لازم تروح علي حِجرها
و تعود وَحيد َندْمان
و أعرج
و مقَسِّمانا الأزمِنه
لفِرَق و دَوْرِّيات
و قدَرنا نُسكن حِلمنا
و نعيش ف أُمنيات
و إن فات حنين من جَمبنا
نِرجع بشوق و آهات
و آدي حال حياتنا و قلبنا
بنموت من الحرمان
كأعرج
وإن جات إيدين بتْطَبْطَبَك
ما تزيدش في الدَّمعَّات
في الضهر مُمكن تِضرَبَّك
و تفوق في موت و سُبات
فيها القَريب بيغربك
و بعيد في روحك بات
و ف يوم هتعرف مطلبك
و هتصرف الغربان
تِعرَّج
وإن شُفت عُمر أمَّا انسَرَق
آمن بإنك فوقت
فَتَحْت لَمَّا الكون سَبَق
أكَلوا النَبَق و شرِقت
و لبِست توب من غير خَلق
و لكل خَلقّه عرِفت
لما اتغابيت سَرقوا العَرَق
و سَقُوك ضَلال و شرِبت
و فضِلَّك الشُوك و المَرق و المُرّ و الخُذلان
و أعرج
،
و إن شُفت قلب أما اتحَرق
اعرف بإنه اتخان
عَاش لحظة الموت و الغرَق
ورا كل يوم بيبان
و الصَبر فيه عَدّ و سَرَق
عُمر و سِنين و أمَان
و رجع بحسره بدون دوا
من لَوْعِّته عَطْشان
و أعرف بإن الوعد شيء
باهت، ضعيف، بطلان
و أعرج
و إن شفت خلق بتبتهج
ف اعلم بإنه القوت
مع كل دم بيتمزج
و ينَطَق المَسْكوت
و بيعدِّل اللي بيتعِوِج
و بيُرْبُط المَفْلُّوت
بيه الكُرب راح تِنْفِرِج
و مفَرَح الغلبان
الأعرج
قلبك المَيَّاس
أنا كنت تُوهَّه في قَلْبك المياس
و كنت شِيله ف عُمرك النَّازِح
كدَّاب و زَي ما قالوا كُل الناس
عَذِبت روحي بقلبك الجارح
مَجاوبتِنيش و لا جَالي منك خبر
زي الشَرر بيشِت ويَّا الريح
نَيزَك و مَالي الأرض رُعب و حُفر
كل اللي عندي من هواك تباريح
.
الوعد كام ليله و خلاص انقضي
و كإنه كان حلم اتنزع بصباح
هو إنت قولي إذاي بتعرف رضا
و تنام و عادي كإن عمري ما راح
.
و إديك عيوني و تطلب الأوردة
و تاخدها عادي و كل دا مَسموح
و أنا لو طلبت تقولي لاء مش كده
طب و اللي خدته إذاي مَعاك بيروح
.
طَب خُد و هَات و اديني مِنَّك أمل
يمكن أعيش و أنا جوه مني أمان
و إذاي آوام في الحب يسري الملل
و لا هواك كان كدب و خلاص بان
.
سِبت الحياه و جريت عليك و رَاهِنت
و خِسر رَهاني و راجعه وَحدي بشوك
و دَفَعت قلبي و روحي و اتحملت
و إديت و خدت وَجع كتير و شكوك
.
و آدي إيدي فاضيه، بس متوجعه
و لا فيها حِمل لشيل و لا لسلام
خلصت حياتي و ماشيه و مودعه
حطمت كل حياتي و الأيام
.
حبيت أقولك بس عشت إذاي
و إذاي حاولت و كام وجع مريت
مبقاش معايا أي شيء للجاي
و بودعك و بقولك اتهديت
.
لا هغير عليك و لا ألوم و لا هعاتب
و تعيش براحتك تشتهي الأشياء
في الدنيا تمشي سعيد و تتعاجب
و إنساني و كإنك تركت الداء
.
و تقول عليه كل شيء مسموح
لو فكروك أو جرحوك في كلام
و ربي شاهد عنده مش هيروح
الحب و الصدق اللي عاش منضام
.
و هتنتهي القصه و فصلك جاي
أصل اللي داس قدام كمان هيدوق
و إنت اللي كنت الظالم النساي
هتشوف نصيبك من ألم و حقوق
.
أختي الكبيره
أنا ربي واهب لِيَّه
أجمل أخت
عِشت في عيونها
و واحده واحده كبرت
و لقيتها أمي التانيه في الأيام
و حنان بيملا الدنيا
ورد و نور
وقت الوجع بلاقيها ويايا
هيه الأمان و الحلم و هنايا
و الضحكة وقت ما تِهجم الأحزان
هيه الكلام
لو مره واحده سكتت
أختي الكبيرة
دنيتي الحلوة
مشواري لما أمشي
و مهما سافرت
و وطن عيوني تنام و ترتاح فيه
و ف حلمي بتنور ضلام الليل
يسكن نهاري في ليلي مهما حاولت
حكايات كتير عدت و ملهاش عد
و إن حد مره اِعْتَد فيه بِتْهِت
تِسكت عَدِوِّي بِنَظره تِملاه خوف
و أنا جوه جوف أحْضَانها
عُمري ما خِبت
إيد بتساعدني لَجل ما أتعلم
و شهادة عمري ما أخُدها
مهما ذَاكِرت
زي السما توهِبنا كل الخِير
و أفضل بخِير وياها مهما عجِزت
هيه الكلام لما يفيض صَمتي
نبض الحُروف مِنها لو اتكلمت
عَلِّمني خيرها أنكِر الأيام
ما هو قلبها دُنيا و بيها آمنت
مفهاش سَواد و لا مره تتغير
و أرجع أدوَّر عنها مهما غفِلت
اتحملتني و جَمَّعت غَضَبي
و عرِفت بالسنوات بإني عِقلت
وقت الهزار استوعبت لِعبي
مقالتش تعبانه لو استَهْبِّلت
و عرِفت إن صعَاب كِتير عَدِت
بس أختي عَدِت عادي
مهما جادِلت
زي أخت موسي ف خوفها راقبتني
و ف ضهري زي هارون
إذا اتلجلجت
لو سَرَحِت شعري متوجَعنِّيش
و أما يِفِيض شِعري تقول أنا دُبت
جمهوري هِيَّه و هيه اسطورتي
و بطل روايتي نهر مِنُّه شربت
و نجوم بتلمع في السَما تِضوي
و أنا قلبي وَلهان بيها
لو عَجِّزت
لو جَانِّي نوم تِحْكِّيلي حَدوته
لو شُفت لُوم ف الدنيا
عمري ما آشِت
بَرجَع لها و حكايه ف حكايه
تِمشي السِنين حِلوه و لو اتكَعْبِّلت
و لو اِنكَسَرت تكون لي عُكازي
و مَلاذي و عزازي و أحضاني
و رَحمه تِحميني في يوم ضعفي
و قوت مِقَوِّتنِّي لِحَد ما طِبت
طِيبتي حبيبتي يا طَيبه بيكي
رُوحِّي اللي مِن حُبّك لها كَمِّلت
تِقْفِّل ساعات و ساعات ماتِقفلش
و أصبح علي صوتها تلاقيني فوقت
أجمل بدايه في يومي و ف عُمري
و أعز من عمري اللي فيه أنا عشت
تِخْتار مَعايا الحِلم و الأشياء
و تحَلِّي لِيَّه المُر لو بَسْتَّاء
هِيَّه المِداد و الصَبر و الأوراق
بقراها و اتعَلِّمْها مهما كَتَبت
هيه البَصِيره لو ينام البَصَر
هيه الأمِيره ترُد غِيبتي إن غِبت
و ترُدِّني لِروحي إذا بِعْدِّت
أو م الوَجَع هِرِبِّت أو اِتْغَلِّبت
تِحْمِيني من شَرِّي و من نَفْسِّي
مَهْما من الدُنيا اُبتُلِيت و ضعِفت
هِيه الإِيدين لو إيدي مش قادره
تِسبق خَطاويا لو اِسْتَعجِّلت
تِقرأ لِي كَفِّي و تِعرف الطَالع
لو سَهْمِّي طالِع أو ف مَرَّه خسِرت
و تشُوف نَصِيبي حِلو و مطاوع
هِيه البِشاره و بيها أنا بُشِّرت
تِزْرَعْنِّي وقت البور ما ينْزَعني
و تشِيل مَخاوفي و حِمْلِّي لو حَمِّلت
و تشِيل عِيالي و كل أَوحالي
مَقَالِتش مَره من وَجَعْها تِعِبْت
يِمْلَّا الخَضَار عُمري و أنا جَمْبَها
و ف ضِلَّها آمِنت و اتأَمِّنت
هتعيش حبيبتي و أختي و مرايتي
و أماني و حكايتي و طريقي إن تُهْت
تيجي آقولك
تيجي آقولك ألف حاجه
من اللي لسه مقولتهاش
وعد مني استني وعدك
و أنسي لو قلبك مجاش
تيجي أحبك و بسذاجه
و أنسي عقلي و معرفوش
و إن حايلني مشوفش حاجه
و إن عاتبني مكلموش
قلبي طفل بيستخبي
م الحياه في بحور عينيك
و لهواك جمع المحبه
لم شمل الورد ليك
تيجي أعلم روحي قربك
حتي و إنت بعيد تِحس
و ف بلادك هبقي جمبك
هتلاقيني ف أي همس
و اشتكيك مِنَّك لقبك
و أعتِرِف لك بالظنون
و أكتِوي من حَر حُبَّك
و إن نَادِيت ف الثانيه أكون
و أنسي بيك أوجاع حَنِيني
و أهوي فيك المُسْتَحِيل
و بإيديك تِرسم سِنيني
قلبي شمس و عُمري نِيل
و إنت تِحيا ما بين عِيوني
و اسكُنَّك ف العُمر لِيل
تيجي أقرا لك رسايلك
حتي لو مكتبتهاش
قلت فيها القلب جَايلك
و بهواك العُمر عاش
و أكتبك في العمر صَفْحَه
أقرا من اسمك حروف
كل حرف بألف معني
كل معني معاه نطوف
يحلم الحلم بهوانا
و يهرب الخوف و الظروف
و أستِمع صوتك بتحكي
كام وَنَس وَيَاك يكون
خَدت روحي خَطَفت قلبي
و اِتندت ليك العيون
أنت بتكدب لِسَّه عَلَيَّه
أنت بتكدب لِسه عليه
بعد ما شفت بعيني خلاص
هتقول إيِه مَبَقاش بإيديه
دَوِّبت معاني الإخلاص
فِكرك خُنت دِي حَاجه عَادِيَّه
يا مموتني بنار و رصاص
أنت بتكذب و بتتساهل
فِكرك لسه أنا هبقي عليك
ممكن أسامحك لو تتشاغل
بس خيانه كتير، يا عنيك !
و بتِرجع تِبكي و تِتْحايل
و كإني أنا بَتْجَنَّي عليك
طَبْ لو تِرضي إننا نِتبادل
ينفع أَخون أو أحِب عَليك
أو يِنفَع أسِيبك بالسَّاهِل
و أرجَع أدوب و أتُوه في عينيك
قُولِّي إذاي الحب يا جاهل
و أنا هسمع أسباب معاليك
يا ابو قلب بيكسر و يشاغل
و بيقبل لغرامي شريك
إياك تكدب تاني عليه
علشان عمري ما هرجع ليك
إنت بتكدب لسه عليه
بعد ما شفت بعيني خلاص
سألتك باللي بيننا
سألتك باللي بيننا
من أول ما اتقابلنا
هو احنا اللي كِبرنا
و لا الدنيا قَسِت
أيام دابت ما بيننا
و بأوجاعنا اتشاغِلنا
و الدمع كتير تاعبنا
و الأشواق اِتْنَسِّت
طَب قُولِّي لو حبيبتك
و حياة حُبَّك و طِيبتك
مَتسبنيش بعد قلبك
بَلقي الدنيا اِنتهت
سألتك لو يسَاعك
لو يوم تنسي وداعك
و تاخدني ما بين دِراعك
بَلقي الفَرحه ابتدت
سألتك لو سَافرنا
لو رُحنا بعيد سِهرنا
و الليل غَطِّي عيوننا
و الأيام ابتدت
و نعود تاني لغرامنا
و نسِيب اللي ظلمنا
و اللي جرحنا و ألمنا
في الصفحة اللي انطوت
و سألتك لو حنيني
لِسَّاه ويَّاك يا عيني
تُبدُر شمس ف جبيني
لدروب لو ضَلِّمِت
و يسير الشوق بشوقنا
و الحلو يعود يدوقنا
و الورد نجاه و طوقنا
لقلوبنا اللي اِرتوت
سألتك باللي فِينا
بحاجات ضِحكِت علينا
و سنين مِسكت أيدينا
رَبيتنا و رَتِبت
كفاياك م الشوك و ناسه
راح نجنيه من أساسه
و اللي سقاه و اللي ساسه
دي عهود عَدِت مضت
كل ما قالوا اسمك قُدَّامِي
كل ما قالوا اسمك قدامي
أنا مش عايزه اسمع
بكلامهم قادوا في آلامي
و إيه راح يرجع
كل القصه إن إنت مودع
خطوه آلاقيك
١٠٠ خطوه بترجع
نار في كلامك
هجر بيوجع
و أنا إنسانه بموت بأمانه
و شفت هوانا
بعيد و مودع
كل ما جابوا ف سيرتك ليه
أنا بتأثر
و بقول عادي غيابك عني
و أنا بتدمر
كل ما أفكر بتعب أكتر
و لا قادره أتكلم و لا أغير
وحدي بعدي
بناري و بعدي
و مين خد يدي و مين يتصور
شوف كام سنه عدت
و أنا أعدي
و عمري اتسرسب
دمع كتير عَلِّم علي خَدِّي
و بقيت بحسب
وحدي رجعت
بحزني و صبري
و الكل اتصعب علي أمري
و طلعت ورا الريح بجري
و حلمي اتبعتر
كنت بخاف أشتكي أو أعاتب
لا ف يوم تزعل
خفت لا يوم
تيجي و نتحاسب
تمشي و ترحل
و كل ما آحاوط قلبك يهرب
و لا حس بلوعتي و لا جرب
و لا من إللي أنا دوقته بقي بيشرب
عاش بيكسر
ليه السكوت مش رضا
ليه السكوت مش رضا
رغم إن قالوا كده
مين يرضي من غير هدي
لو القلوب صده
نسيوا النبوه بصنم
و بنوا الإله العدم
و اتساقوا زي الغنم
للشرك و الرده
نفس البشر كلهم
الشر من طبعهم
و الخير كمان منهم
و اللين مع الشده
اتعلموها بقي
العلم مش مشنقه
كتب القلم و أرتقي
و اللي قرا بيهدا
النور مكانه السما
و الحق مش أوسمه
فتح عينيك للنِما
دا الروح هناك خالده
الحبل موصول نفس
ف اجلس كما اللي جلس
و اصنع لنفسك ونس
بين ذكره و السجده
و اسأل تلاقي المدد
و اسعي آوام يا ولد
تسكن يجيك الهدد
و الكبت و الوأده
و الحق راح ينتصر
مهما الشرور تختصر
و لو القلوب تعتصر
بكره بسلام ترضي
و العدل هيعلمك
بميزان ما راح يظلمك
مهما السنين ترسمك
القسمه ليك واحده
دا قدر و متنامش قوم
مدامتش و لا راح تدوم
قاوم و لو للسموم
هتقوم من الرقده
و أشكر إلهك دا نور
ماتسيبش للذنب سور
دي الضلمه تكسر جسور
و بتجلب الوحده
مرجعتش ليك
مرجعتش ليك، علشان مش فيك
و لا جوه عينيك، و لا حساني
و عايزني آداويك، و الجفا بإيديك
و إنت اللي جنيت، و اللي رماني
فكرني ف يوم، ضاع فيك اللوم
و الغدر غيوم، مش رحماني
قلبي المظلوم، وياك محروم
عاش بيك مقسوم، و إنت الجاني
شفت الأوهام، لسنين قدام
و الحب كلام، داب ف ثواني
دور لي عليك، لو راح تلاقيك
و إن عدت ف يوم، ضاع عنواني
يا غازل لي قيود، رافضه إني أعود
قلبي الموءود، بقي يعصاني
تقفل بسدود، و تحط حدود
تمنع و تجود، تتعداني
وقفت حنين، مبقاش بيلين
قلبي المسكين، بقي شيء تاني
مسكون بسنين، و إيدين دايبين
و دموع غارقين، و شعور فاني
الوصية المكتوبة
أما أموت
ادفنوني جمب والدي
و جمب جدي
بقلب جدري
عند شريان الخواطر
قرب جبران المشاعر
في المقابر
اللي مدفون فيها أجساد الغوالي
اللي أرواحهم في أحلامي و بالي
و اللي أسمائهم بتتضفر باسمي
و اللي ألوانهم في رسمي
و ف ملامحي
و اللي ذكراهم في وردي
و ادفنوني جمب والدي
و اللي قالوا ف سيرتي مره
و اللي جابوا ف قلبي قهره
لما عاشوا ف عمري حسره
و اللي عشرتهم مغامره
اطردوهم من جنازتي
و ابعدوهم عن شجرتي و عن حيازتي
عن مواطن عشتها و عاشت في سمتي
و بإرادتي
و الميراث حبة دفاتر
كل ساتر يحكي ساتر
صوروهم
ثم بعد الجمع ابقوا وزعوهم
و اقروا فيهم
يعني ايه بعد الربيع
قلبك يشتي
يعني إيه الدنيا تاخدك
و سط خلق كتير و عالم
بس وحدك
يعني ايه الدمع يحفر
شكل خدك
و الحمول تكسر رقبتك
بس تفضل زي جذع النخل واقف
لسه صامد
لسه حامد ربه راضي
و برضاك ترسم سعادتك
و اقروا فيهم
و اسمعوا صوت الورق
لما يدَمَّع
أصلي كنت كتير بَسَمَّع
كنت ساعة حزن بخضع
و أنطفي و الصبح ألمع
أما عن أولادي هما
دول سبيلي و سلسبيلي
و الدعاء منهم هديه
بنتظر نورها يجيلي
عاشوا في الدنيا
شموس قلبي و دليلي
و ابقوا لما يجي ذِكري
اترحموا و ادعولي
متفكرنيش
متفكرنيش بحاجات عدت
مبحنلهاش
أحزان جابت فيه و وَدِّت
و الشوق مَبَقاش
دا الخد من الدمع استكفي
و الفرح مجاش
اديتك قلب كتير وَفَّي
و قلبك موفاش
فماتسألنيش عن اِيه عدي
أصله مَعَدَّاش
.
أنا لَمَّا اِحْتَجْتَك في مَواجعي
رديت بجحود
و سْنين و أنا وَياك و أتاريني
أنا مش موجود
و عايزني أتغير، طب حاول
غير جُوَّاك
.
عايشه أنا وياك بحرق نفسي
و لا نُلت رِضاك
و لا فارق ليك و جَعِّي بعمري
و لا جرحي معاك
طب إيه بيفرح في الماضي
يشفع لهواك
.
أنا قلبي خلاص مبقاش مِلكي
و لا ملك إيديك
مش عايز يرجعلك يبكي
و يدور حواليك
جرب في البعد يغيب عادي
و عرف ينساك
.
أنا كنت زمان لما بتبعد
بزعل و بموت
و كإني ماكنتش بتنفس
و أفضل مكبوت
و بقيت بتغرب عن نفسي
و عايشه اترجاك
.
جربت أنا كل ماتتخيل
و هزمت الضعف
و عرفت أخيرًا أجيب روحي
من عز الخطف
أنا قدامك واحده قويه
و قادره اتحداك
.
فبلاش تتحايل و تجادل
ف كلام مبتور
أنا عشت بعالج ف مشاكل
و بقت دكتور
و داويت القلب أما إتاكل
من كتر قساك
لسه بتسأل
لسه بتسأل على عنوانى
لساك فاكر قلبى برئ
لما جرحته وسبته يعانى
كان فين قلبك دا يا رقيق
انسى يا غالى إن إنت هوتني
انسي كمان إن إنت رمتني
وانسي غرام كان بيموتني
و كإنك عمرك ما رأتني
شوف نفسل في مكاني لمره
هتلاقى كل جراحك مرة
ياما حاولت أستناك تصحي
بس بجد ماكنتش قادرة
أصبر أكتر تخدع أكتر
و تسيب عمري
فى حرب وثوره
هون على نفسك و انساني
عشان عمري ما هرجع تاني
قد ما جرحك حطم فِيَّه
بُعدك عَنِّي كمان قَوَّاني
وبلاش تسأل عني لأنى
نويت من بعدك أبدأ تاني
انسى يا غالى إن إنت هوتني
انسي كمان إن إنت رمتني
وانسي غرام كان بيموتني
و كإنك عمرك ما رأتني
كُتر الصبر
كُتر الصَبر عَلِيك خلانى
آنسي مشاعرى وآنسي كيانى
يكبر جرحك ويزيل فرحك
ويدوب فيك العمر الفاني
أنا سميتك عمرى الضايع
أنا سميتك ألمى و وجعى
كنت بتجري في عالم تانى
وأنا بعذابي بجفف دمعى
بتعشمنى ببكره أستني
وأفضل عايشه بحيرتي ولوعى
كثر الصبر حقيقي بيتعب
وأنا من ليل على ليل بتغرب
كل ما أدادى الشوق وأحايلو
يزعل منى ويحرى و يهرب
واحتاج ليك لكن من صدك
تبقى عليه من الناس أغرب
ايوه الصبر حبيبى بيألم
و أنا للأوجاع مش بستسلم
طعم المُر في حبك غَالب
وأنا مليته و ربى الأعظم
لكن مش قادرة أهرب منك
عايشه ببكره أتمنى و أحلم
برتاح معاك
برتاح معاك
و أشتاق لدنيا تكون هَنَاك
وأسعد بفرحة نول رضاك
واحلم بنور جنة ضياك
وأتمنى أكون زيك ملاك
و فى عمرى ما هعشق سِواك
ودى عهد عليه أصونك فى عِينية
وحياتى الجايه تبقى وَياك
برتاح للنسمه اللى تِعدى
وتيجى من قُدَّامَك
واشتاق للبسمة اللى بنولها ولكل كلامك
و أسمع للأرض اما تغني
بخطوة أقدامك
واقول تسلملى ويسلملى حبك وغرامك
برتاح قوى لما بتضحك لى
وتخاف على قلبى
وبقول مشى عايزة اشوف من الناس
غيرك انت يا حبى
ما خلاص يا حياتى بقيت عمرى
و دربك بقى دربى
عاللى بعيش فيه انا وحبيبى
أنا بحمد ربى
مَتْقولِيش حُبَّك مَلَكْنِّي
مَتْقولِيش حُبَّك مَلَكْنِّيي
كل شيء فيكي هَلكنِّي
كل شوق شُفته ف عِنيكي
خَدني من روحي و تَركني
ف اِنشغالي
ببكي حَالي لذِكريات جَت بتعاركني
متقوليش مشتاقه لِيَّه
أنتي مُشتاقه لعذابي
أنتي ياللي ما يوم عِرفتي
يوم وجودي من غيابي
كنت كل الشوق و شفتك
من قريب أنتي سرابي
و اللي قاسِيه في غرامك
عُمري ما عَملته في حِسابي
حُبِّك اللي بِنَارُّ يِضوي
بان و أصبح نار بتحرق
جوه منه انا كنت بجري
و كل ما آجي أتشد أغرق
و اللي دوب عمري كله
أيوه ليه أنا لسه بعشق
قلت أسكت أو أداري
لقيت حنيني اللي بينطق
اصْفَّي شُوَّيَّه
اصْفَّي شُوَّيَّه
ما تصفي شويه
لون قلبك باللون الأبيض
اصْفَّي شُوَّيَّه اصْفَّي شُوَّيَّه
دا اللي يحب ما يعرف يرفض
قلب حبيب بالخير بينور
على سَعدك وهنَاك بيدور
كان مِراعيك من وإنت صغير
ياللي عينيك بتكدب
كل اللى ف إحساسك
شيل الشول من قلبك
وما تحسبش حسابك
ليه تتخابث مانتش حاسس
ده بيجرحني
نفسي فى مره
تكون كدة طيب و تفرحني
ليه دايماً
تعمل كل اللي
ما هوش بيريحني
لما تقرب ليه تتغرب و تخاف مني
صفى غرامك
دى أنت الروح
والعين والننى
طمن قلبك و إياك تبعد
لو يوم عنى
اتغيرت
اتغيرت ومش هنكرها
من كثر الآمى اتغيرت
أشواقي وأيامى فاكرها
وسطها ضعت ودبت وتوهت
اتغيرت حقيقى لأنى
مش لاقياك غيرانسان تانى
إنساس خادع غدار ظالم
إنسان مغرور قلبة أنانى
ضحى بقلبى وعمرى وحبي
ويقدر يهجرنى وينسانى
إذاى هقدر أكدب قلبى
وإنت بقلبى كتير بتضحى
كت بقربلك وبصونك
وأنت تقرب تكسر فرحى
قوللى أذاى تبقى أنت حياتى
ووجعى ونارى وحيرى وجرحى
ياما حاولت انسي بايع
و إنك تقدر لحظة تبعنى
وأفضل أقول بكره هيتغير
يجي بكره و تاني تضيعني
نفسى أعرف قوللى وريحنى
بتحبني ولا بتخدعني
محبوبي
و لبست غير توبي
ما عرفني محبوبي
و سألته عن اسمي
قال شيء ما كان بالبال
قاللي إنت مين ياللي ؟
تشبه حبيب كان لي..!
و سمعت ناس قالوا
إنه غريب الحال
لو شفته قوله يعود
قوله أنا موجود
قوله الدموع جفت
و كفايه م الترحال
ياللي الحبيب شبهك
احلف لي و بربك
لما تلاقيه قوله
أنا ليه عنده سؤال
ليه الجفا طبعه؟
و البعد عنده حلال!
لو شفته قوله يعود
قوله أنا موجود
قوله الدموع جفت
كفايه م الترحال
هو إنت ليه ساكت
و ليه الدموع يا سابت
و ليه هان عليه عمري
و العمر ما بينشال
شكلك كده زيه
مش لاقي شيء يتقال
لو شفته قوله يعود
قوله أنا موجود
قوله الدموع جفت
و كفايه م الترحال
اللى قلبه
اللى قلبه مكانش ليك
واللى دمعه مش عليك
واللى عاش عمره معاك
عاش معاك و لا عاش إليك
قضى عمره فى ذكريات
وحكايات مع حب فات
أيوه خانك ساب حنانك
فات غرامك، باع عينيك
هو خاين ولا لأ
ولا أنا اللى هويته سرقه
عاش بقلبى دقه دقه
عاش وقلبه فِيه شِريك
لأ يا قلبى مش هتقدر
الفراق قضي و مقدر
سيبه هو اللى يقرر
هو باع و لا شاريك
اسألوا اللى مشاعره تعبت
مره جاتلي و عشره رجعت
مره زادت ميه نقصت
ايه باقيلي يا غالي فيك ؟
ايه يا غايب مش هترجع
ليه معايا كتير مودع
دى الفراق فى القرب أوجع
من فراقي العمر ليك
قلب كسرتة
أتـعـودت خـلاص عـلى ظلمك
واتـعــودت عـلـى الـحرمان
طال البعـد وطـال لـيه جـرحك
و دابـت مـن عـينى الاحـزان
عـايـز أيـه من قلب كــسرته ؟
عـايـزه يحـس اذاى بـأمــان
تـألــم فيــــه وتــعــذب قـلــبه
و عـايزه يـقـول انـك إنـسان
عــايــزه يـقــول أنــك بتـحبه
وانه لـبحـر هـواك عطشـان
عـايزه أعـرف قوللى ريحني
و أعـرف آخرة وجعي كمان
اتــعـــودت تعـذب قلـــــــــبى
وقـــلبى يضـــمك وينـــسـيك
مـن كتـر غـرامى ومـن حبى
كنـت بتجــــرحنى وبـداويــك
اصـلك مـنى وغـصب عــنـى
بخاف من دمعى لايوم يأذيـك
واطـوى آهـات الليـل بسكاتى
لاصوت احزانى يصحى عينيك
أتـعـودت تـمـــــرر عـــمرى
وأنـا بغـزلــك وجـعـى بـفـرح
قـلبـى يصـونك ويصون ودك
وأنـت تهــد كـيــانـه بـجـــرح
وازرع فـيـك الحـب وامــلــه
وغـــدرك يحـرق كــل الطرح
قـلـبى تعـب مبـقاش يتـحـمــل
يـعـلـىّ وتيـــجى تهــد الصرح
روح لبعيد
روع لبعيد عشان يرتاحوا
روع لبعيد يمكن تنساني
اشغل فكرى بجرحك ِليَّه
وامسح مِن قلبك عنوانى
وانا برده هروح لبعيد جايز
أنسي عذاب الآه وجراحه
جايز نقدر ننسى حبيبي
جايز نقدر ننسي وجايز
يغلبنا الشوق ترجع تانى
روح لبعيد فكر من تاني
في جراحي وحبى و أحزاني
في اللي قالوا لك تبعد عنى
وتلوم قلبك لو يوم جانى
روح لبعيد عشان مقدرش
قلبى يكون فى حياتك جانى
و أما تحِس بظُلمَّك لِيَّه
وتِقدر تِتحمل علشاني
ابقى تعالى وبلاش نبعد
وإن مقدرتش ابقي انساني
روح وابعد عن قلبى وفكر
ف حياتي ف بعادك و اتصور
يمكن تلقى حبيب وتحبه
و أبقي أنا قصه مضت مش أكتر
روح لبعيد حاول تسمعهم
و أنا سبني أروح للمتقدر
و أما الشوق يغلبني وضعفي
و الأيام تكسرني و تقدر
هطوي جراحي و ألمي و أدعي
لقلب ضعيف يوم يقوي و يقدر
نسيت أسمي
نسيت نفسى وأنا بهواك
نسيت أسمى نسيت رسمى
نسيت عمرى اللى ضاع وياك
وأنت نسيت تكون عاشق
بتجــنى وتقــسى وتـــفارق
وتحــلف انك أنت هويت
وامتى أنت بقـــيت صادق؟
هويــت بيــك الـزمن كله ه
ــويت الحــــــلم والأيـــام
هـويـت الـكلمـة والأنغـام
هــويت حتـى فى لؤاك الآم
وضــاع مـنـى الهــوى وآمـلة
مشيت أنا ويا كل طريـق
حاولت أنسى إن فيه حريـق
لاقتنى بعيش على ذكراك
بدوب واغرق وأنا فاكراك
حنينى وهم يخطفـــــــنى
وحبى شىء مخوفــــــــنى
وتوهت فى بحر بس غريـق
يا وهم فى قلبى قوم هنساك
وأحاول أنسى عمرى معاك
هــلوم قـلبى بـفـــكرة فـيك
و هـكتـم كـل صـوت يناديك
و أقـول أنا كـنت يوم بهواك
يا ليل فكر معايا و قول
دى أيـه الــلى ف هـواه هيـزول؟
أنـا الـلى الـدمع منى إحـتـار
عــشـان حـبه بـعيـش الـنــار
ليه بنسى أنى اللى هونت علية ؟
و إن الـقــلب تــعــبـان بـيـه
و ليــه الـشـوك معـاه بيطـول ؟
ليه بتخاف من الحب ؟
ليه بتخاف من الحب يا قلبى ؟
و ليــه بتــخاف مـن الــنــاس؟
لـيه تـــسكن دمعك و جروحك
و بــتـــــــرمـــــــى الأحســـاس
ليه بتشـــــوف الناس بعيــــونك
زي مـا كـانوا مــعاك قاسيين
تقـــــسى علــيهم و تلوم قــلبك
لــو قــلـــبــك فكر فى حنين
ليه بتخاف تظهـر بـعـــواطفــك
عـــايــش مـش زي العايشــين
ليــه يـا حبيبي بتسمــع دايمًـا
للــمــاضـى و دمـعه أجراس
كــل الناس من الدنيا يا غالى
يــامــا بتـــتـــجــرح و تـــدوب
بس الدنــيا كـمان يا حبيــــبى
فــيهــا قلــوب مش زى قلوب
خايف من صوتك لو نـــــادى
يــهــمس فيه حب و أشــواق
حتى عـــيونك خـــايف منـهــا
لـو شــافـــت قـــلبك مشتـــاق
دايما تــهـــرب مـــن أحبابك
عــايــش عـلى ذكرى أحزان
بس أحــبابك لو يــوم راحـوا
هــتعيش طــول عمرك ندمان
عــيش يـا حبيبى الدنيا معايا
و أنــت هــتنسى ألام و عذاب
نـغـــزل أمـــل الــفرح مــحبــه
و كل جروحنا تعيش فى غياب
أوعى تعيش طول عمرك خايف
أحســن تــغــرق فـى الأوهـــام
تــــبكى و تـــردد فى أهــــاتك
و تســــــــرق عـــمـــرك الأيــــام
بأيديك طيب جرحك و أنسى
قـــلب قــابلـــته و كــان كداب
قريب منى حبيبى
قــريــب منـى حبــيــبــى
وغـــريــب عنــى حبـــيـبـى
بتــقـسى قــلـبى و تســـافر
وفــايـت حبـى و مــهــاجـر
بتـبعـد عـنى عـــيـنك ليه ؟
وغـريــب عنى حبيبى ليه ؟
سـاعـات بـــشـتاق لأيامك
واقـول فيـنك؟ و أنا ويــاك
واحـس بــكــل الآمــــــك
وبـتـعـذب بصــمت جفـــاك
يا شـاغل قلبــى بشــــرودك
وصـلت لفـيــن مـع فـكرك ؟
وليه بتنسانى فى وجـودك؟
وقــلبى فى الغياب فاكرك
حبيبـى ليــــــــه بتنــسانى ؟
وتقــــسى عـلــيه بسكوتـك
ولمـا اســأل عـلى حيـرتك
يـجف الـحس مـن صوتك
حبيبى راح غرامك فـين ؟
وليه بتزرع قسى في قـلبك
كتـيـر بـاجى عـلى نفـــسى
و أخبـى دموعي في عيـنيه
أخاف تعرف عذاب حيرتي
تحـــس بـرعـشــة في إيديه
حبـــيبى لــيه محيــــرنى ؟
و بتعذبني أحزانــــك
و إيه فيك اللى متغـــــــــيـر
و زال وِدَّك و حنــــــانــــــك
حبيبى عـمـرى ما هـقـــدر
عـلى جرحك و نـار هجــرك
نجمايه
خليني لقلبك نجمايه
تطلعها فوق
أو نسمة هوا في الضلايه
تخطفها تروق
خليني أحبك و كفايه
إنك تبقي قصادي معايا
وهداوي بقلبك دنيايا
و نداوي الشوق
خليني معاك أسبق عمري
و أهديك ١٠٠ عام
و أسافر بيك من غير عمري
و نعيش قدام
و نسيب الماضي بأوجاعه
أيامنا كتير تعبوا و ضاعوا
و آمنا كتير لقلوب باعوا
و قوم بينا آوام
كلمني كتير أنا سمعاك مهما
الوقت يطول
علمني أطير، ما أنا يا ما معاك
للنجمه بنول
هنسيب الناس و الكون فاضي
و نعيش ف عيون الشوق عادي
و الحب ما بيننا يكون
زي الأحلام مسروق
خليني لقلبك نجمايه
تطلعها فوق
راح أغني و لما هتسمعلي
هتقول أنا حور
هتروح و بسرعه هترجعلي
كإنك مسحور
و ف وسط الضلمه هتندهني
تلاقيني النور
مهما تكون مهموم م الدنيا
هتشوفني تروق
مش عايزه أنا غير وفا من قلبك
علي حبة شوق
و اتدفي بروحك و بحبك
و تشوفني شروق
و ف يوم الحر هكون ضلك
و سحاب بيروق
خليني لقلبك نجمايه
تطلع لها فوق
بريئة بجد
أنا لا بنيت أحلام علي حد
و لا وزعت الشوك ع الورد
و لا شقيت بدموع علي خد
و لا هديت زي ما بتهد
أنا إنسانه بريئة بجد
.
أنا عصفور بجناح مكسور
ضلمه بتحلم يطلع نور
عشت بحاول أهد السور
و أبني معاكوا وداد و جسور
كنت بساوي و آداوي الصد
.
مبشوفنيش و لا عايزه اتشاف
و لا م الوحده بعاني و أخاف
عدي العمر وجع و عُجاف
و اللي زرعته لقيته جفاف
و أذي كتير من أقرب حد
.
متمنتش إلا المسموح
و لا قدمت لغيري جروح
كل كلامي كإنه شروح
و عبرت بدمي المسفوح
لا عاتبت ف يوم و لا بَحتد
.
و آدي الروح و آدي الجلاد
نفس القصة اللي بتتعاد
نفس الحب و جع و بعاد
أوجاعنا بتتباع ف مزاد
باب الرحمة معاه بيتسد
.
و اللي عازمني علي الأشواك
و اللي بيضحك هنا و هناك
و ف وشي بيعمل لي ملاك
كله بيتمي لي هلاك
مستنيني لتحت أتشد
.
أنا بتأسف لكوا ع الشوق
شكرًا ليكوا قدرت أفوق
همشي و هرفع راسي لفوق
دا لإن أنا عشت المسروق
و إنتوا سرقتوا كتير بلا عد
.
بمشي يمين و طريقكوا شمال
عينكم بس علي الأموال
و لا وفا و لا حب بيتشال
و اللي جنيته لقيته رمال
و بأوجاع ليه بتترد
.
و أسأل مين علي حالي و فين
فضلوا في كل طريق ساكنين
دنيا و مليانه بخاينين
بيمثلوا عاملين مساكين
جاهزين مهما بقول بالرد
.
أنا إنسانه بريئة يا ناس
مشكلتي ف إني بإحساس
و بحس الكدب بأجراس
و بشوف ف العين الإخلاص
و أسمع صوت الوفا بالوعد
الفهرس
إهداء
بسرعه ع المدرسة
بليد
عصفور كناري
يا أعرج
قلبك المياس
أختي الكبيرة
تيجي آقولك
إنت بتكدب لسه
سألتك باللي بيننا
كل ما قالوا اسمك قدامي
ليه السكوت مش رضا
مرجعتش ليك
الوصية المكتوبة
مبحنلهاش
لسه بتسأل علي عنواني
كتر الصبر
برتاح معاك
متقوليش حبك ملكني
اصفي شوية
اتغيرت و مش هنكرها
محبوبي
اللي قلبه مكانش ليك
اتعودت
روح لبعيد
نسبت اسمي
ليه بتخاف م الحب
قريب مني حبيبي
نجمايه
بريئة بجد
