و رب العزه

 و رب العزه 

مش عارف أقولكوا ايه ؟

دي أنا اللي وجعني

مش قادر بإيدي أداويه 

و لا اللي فجعني

مش فاهم 

عمل كده ليه 

و أنا اللي منعني 

إني سهرت ليلي أداويه

و ياما حرمت عيني الفرحه

لجل عينيه

و مشاني شريد ف الدنيا

 ليه؟ أبكيه

و أنا اللي وزنته قد الكون

بكل ما فيه  

و خلي الكون خلاص فاضي

و سابني أشكيه

و زود جرحه ف مشاعري

و داس بإيديه 

و قل بقلبي و إتعدي

و عدي عليه

مخلاش بيننا حاجه حلوه

تعيش بعديه

حرق أشواق، تفكرني

و غَيَّر فِيَّه، غيرني

بقيت بنعيه!

و بنعي ف روحي و ف عمري

و بجلد فِيِّه

و قاسي عليه

و آقاسي الوحده

و الوحده

تعسعس ع اللي باقي إليه

و رب العزه

مش عارف أقولكوا إيه ؟؟

دبح روحي

و خلاني كإني مفيش

هوا و دخان

كإني مكان

 حيطان

تهميش

كإني عيون

بتتمنالي

متشوفنيش

و كنتي مركبه و مرسي

و أنا الغرقان ف محاره

بموت

و بعيش

و رب العزه 

مش عارف أقولكوا إيه ؟؟؟

نهايه بحزن ؟

مش عايز

و رغمًا، بالجراح فايز

و ياما صبرت

آقول جايز

آلاقي ف قلبه خير

و آلاقيه

و أعلِّم فيه

و عَلِّمني العَلام

بقاسيه

و أسسني

و لبسني ف جرح ماضيه

طريق بمضيه

و قلبي أعصيه

و أعصي عليه

و أحاول بس أعيش لياليه

أو أتنفس هوا

حواليه

و رب العزه

مش عارف أقولكوا إيه ؟؟؟

 

انسوني

 اِنْسُونِّي

عَايْزِنِّي أَسَامِحْكُم، انسوني

و اِمْسَّحُوا عِنواني، و تِليفوني

و بَلاش بَقي لَمَّا أَبْقَي أَقَابِلْكُم

تِعْمِلوا نَفْسُكوا بِتْحِبُّوني

.

عَايْزِنِّي أصفالكم فارقوني

ولا تيجوا و لا ينفع تزوروني

أصلي حلفت أنضف قلبي

و أكنس أشكالكم بعيوني

عَايْزِنِّي أَسَامِحْكُم و أنا لسه

من جرحي معاكم بتوجع

اكمني أنا كنت معاكوا طيب

و فداكم ف الشده و مجدع

و اللهي ده لو توزنوا روحكم

بدهب و بلولي أنا مش هرجع

عَايْزِنِّي أَسَامِحْكُم، طب هاجروا

أو حتي تسافروا كتير بره

و تسيبوا حياتنا و تتاخروا

قدامكم كده شوفوا كام قاره

عشنالكوا و كنتم بتتاجروا

ف قلوبنا و مشاعرنا الطاهره

عادي معيطه

 عادي معيطه

عادي الدنيا معايا مخبطه
و اتكلم تلاقوني ملخبطه
أو متحبطه
عادي مفيش خير
و بتزرع حب
يروح للغير
و يدق القلب
ماعدش ضمير
و أيام بتسير
مش متظبطه
و الدنيا كتير
مفهاش تقدير
و لا ليها خبير
و لا ليها لجام
و لا ليها علام
كله بينضام
ملهاش أصحاب
ملهاش أربطه
عادي معيطه
،
و الفرح مجاش من ألفين عام
و تحس الخلق زحام و ركام
و محدش دام
و الكل بيسبق علي قدام
حورات
دولارات
متاهات
أفلام
باهته مشطشطه
عادي معيطه
،
تِعْرَق و تشُقْ الأرض شُرود
و تشَرَّق و تغَرَّب و تعُود
و القِرش بيجي
و مش موجود
مفقود
بيعاني من المرمطه
عادي معيطه
،
ما الدنيا بِتِسْحِل
و لا بِتْرِق
و الأرض بتبلعني
و تِنْشق
و أطلع من جوفها برغم الزَّقْ
تخبطني علي دماغي و بالدَّقْ
و مفهاش حق
إن جيت للحق
و لا فيها مقام
غير للحَلْيَطَه
عادي معيطه
،
ما أنا فين ؟ و أنا مين ؟
بعد الدوران
الشمس بتحرق
ف العريان
اللي مالوش ضهر
يعيش متهان
سلبوه م الفجر
و م الأوطان
صلبوه من روحه
عشان غربان
تِنْتِشي
و تعيش كده مِتْزَقْطَطَه
عادي معيطه
،
و ماليش غير دمعي و بس سبيل
جوايا يفيض قبل ما بيسيل
و مالوهش بديل
غير قلب عليل
غير حزن تقيل
غير المواويل
وسط الشخبطه
عادي معيطه
،
الناس بتدوس و تقول معلش
يرموك لو تزعل و لا تكش
يداروك لو تظهر يوم ع الوش
ياكلوك لو كنت الدود ع المش
و عادي الغش
و قلبي الهش
أخدوه عالهادي
و ع المَخْرَطه
عادي معيطه
،
و تحس إذاي !
ما إنت المشكله
يلوموك لو تطرح يوم اسئله
مطلوب منك تبقي المُعْضِله
و أشرب وياهم دمع و بلا
من غير جلجله
و بدون تلتله
بمشاعر بيضا و متحنطه
عادي معيطه
😪

عزيز

 عزيز

قصة إبداع
.
فيه جمله بتطلع م الأرواح
و فيه كلمه بتسكن في البراويز
و إن سكنت روح جوه البرواز
راح تبقي عزيز
و لو إنت الحظ، تروح لعزيز
و إن كلمه اتمكنت النغمه
و إن نغمه اتأملت الكلمه
و انتقلت من فرحه لحكمه
و اترسمت من حرف لرسمه
حضنت ف وجعنا و أفراحنا
و بشكل لذيذ
تلاقيها عزيز
فتعالي أدلعك استني
و كله بالحب
و لحد ما تبقي في حته تانيه
و هتعمل ايه ؟ لما هتسمع
غير إنك
هتنام مبسوط
مش قبل أما تصهلل صهللي
و تسقف سقفه كبيره كتير
و تدور ويايا علي أماكن السهر
و حاسب، متفكرش
عشان اللي فات مات
و اسمع الضحكه دي و اتغير
لأنه حلو التغيير
و كتر من قربك
للناس الحلوه
و خليك سهران
قول لحبيبتك و هيه قدام مرايتها
زي ما انتي
عشان لما تقولك بطمن عليك
بتبقي رايقه و ف حته تانيه
في دنيا حلوه
و سلملي ع الأعذار
و تعظيم سلام للمخلصين
و اللي يمشي يمشي
لحد ما تبقي الدنيا حلوه
و يمكن يتعلموا
و مهما عدي الكلام
هنفضل نقول
يا بلدنا يا حلوه
و عزيز في الغنوه
و الغنوه عزيز
،
و مهما خاصمت الشوارع
و مشيت متحير
مش عارف هتعمل ايه ؟
هيه خطوه، و هتوصل للطريق الصح
و خليك علي المزيكا
هتروح بدري ليه؟
دي الليالي طويله
خليك مع صاحب الجمال
و قوله يا نسيم
يا للي بتحرك في المشاعر
خلينا نفضل نرقص
يا أستاذ، يا كاريزما
لحد الساعه ٢ بالليل
و متقوليش وقت مش مناسب
يا ابن عمي
و لا خليها يوم تلات
و لا وحده وحده
عشان دي حاله خاصه جدًا
فياريت تراضيني
و تطلعني بصاروخ
بدال ما أهد الدنيا
و تسمعني عزيز
،
فيك حاجه
أنا بهرب مش عارف
اوصف بإيه
ما أنت الأصل مفيش زيك
و بتمسك في الودن زي الحلق
و بتعمل قلق
و كمان بتعلم في الوجدان
زي الكرباج
و يمكن اكتر شويه
كإنك الصاحب
اللي راجع بعد شوق و بنقوله سلامات
مع بعض بيعملوا ثوره
يتقابلوا مبتسمين
و دي غنوه زي الحنين
حاضن وطنه الآمين
بحبك يا ابن بلدي
أصلك مصري و أصيل
داعي يا رب بلدي
كاتب دستور جديد
صانع دستور عزيز
،
غني غني و قول كمان
غني عشان المواطن
اللي بيثور بمليون طريقه
اللي بيثور ع الجرار
و اللي بيحبها بالهداوه
و اللي بيعشقها ف وش الصبح
و اللي ميعرفش العيب
بس معنوياته مرتفعه
و كلنا زي سحابة صيف
و الدنيا ساعات بتدادينا
و اوقات عايزاك علي انفراد
و أحيانًا لولبيه
مع القلب العيل
و اللي بيعلي في الادرينالين
و قلبه دوم دوم تك
لاء مش من الحب
ده خطير خطير
و سداح مداح
و سلملي علي الورد
لأن الحب مملكه
و كلامها و الحانها و مفاتيحها
مع عزيز
،
ممكن تسمعله ٣ ساعات متواصله
و تبقي مبتغيبشي
مش بمزاجك
ده عشان حبيت المقابله
و معايا طول الليل
جمب القمر اللي عاجبني
و أوعي تقفل المزيكا
و ايه السعاده دي
اللي تخليك
تسيبك م اللي خلع
و اللي عليك بينم
و اللي مزعلهم نجاحك
و متقولش أنا غلطان
و لا ظلمت
و قول أنا من جبل
و تعالي ننبسط
و احنا بنسمع عزيز
،
الدنيا زي البومبا
و بتتمايل ع البيت
خليك الحيله بتاعها
شيك و مهندم ف نفسك
و ارمي طوبتها لو جيت
و روح للبغدده و هيه بالمجان
قبل ما تبقي بقرشين
و اشهد لها لأنها
جمالها استثنائي
عماله تحلو و غداره
اطلعلها بالضحكه دي
خليك فولاذي كده و متين
و هيه هتبقي معاك رايحه
و لو قولتلها انا بابا
هترد عليك تقولك
هتروح بدري ليه
ما الدنيا فاضيه اهيه
واخد علي خاطرك ليه
و يا ريت تنسي اللي كانوا
و لا تقولش مين دول ؟
ما احنا وارثين الحق
و اللي يزعلنا بنزعله
و اللي يحبنا بنقوله تعالي
و شكرًا من هنا لبكره
ف خليك حقيقي
و قول لنفسك يا جمالك
لأنك شفت ولاد الناس
و عرفت إن إنت
أعلي نسبة مشاهده
و هتبدع
طول ما أنت مع عزيز
.

  

  

المغزول

 حاولت أقول إني أنا مش ليك

لقيتك المعزول مني

و قمت آقوم أقفل شبابيك

فات الهوي غصبن عني

يا قلبي إيه بس اللي رماك

و فين دواك اللي يفيدني

،

الحلو حلو و مين حلاك

حلواني سُكره دوبني

تبعد كتير و أنا بستناك

و أحن ليك و إنت سايبني

و آقسي قلبي عشان ينساك

ينسي قساك و يقربني

،

من كتر حبي إليك بتغيب

و لا عشان ضامن قلبي

و أعيش بقلبي و شوقي غريب

ملقاش حبيب يفضل جمبي

دي أنا كنت ليك طيب و طبيب

و مكنتليش كل حبايبي

،

حاولت أغيب لكن مجاليش

القلب إني أنسي عيونك

و استني بكره تعود و نعيش

و نحلي أيامنا في كونك

أنا أملي لسه مبيسيبنيش

و لا قادره غير إني أكونك

ارسمني

 ارسمني

.
ارسمني ف بالك عصفوره
جت ع الشباك
أو حتي فراشه بتتنفس
من نور رؤياك
علمني الإحساس
بعواطفك
ياللي ضيا العين
من نور شايفك
و ف كل مكان
سامعه شفايفك
دي أنا حتي بقوم
علي صوت اسمك
و ف إيدي نَدَاك
.
كلمني كتير عن أيامك
من يوم ما كبرت
كام بنت لقيتها ف أوهامك؟
كام غيري عشقت؟
.
و ارسمني الضل بمواعيده
و أنا أكون حواليك
أو طفل ف يوم فرحه بعيده
أو نقش إيديك
و احلمني كإني طريق ساحل
أو موج بيحن
جايبالك قلبي و يستاهل
من قلبك حضن
.
قول اسمي كمان خليني اسمع
و اسمعني و قول
و اشغلني معاك و أنا هتشاغل
و هكون مشغول
شَبِّهني بأجمل أحلامك
و أعز ما ليك
و أتمني الدنيا آهي قدامك
و هكون أمانيك
.
و اضحك للورد أما يغني
يضحك لعنيك
و اسمع لحكاوي الشوق عني
تلاقيها عليك
و ارسمني في نسمه تمرجحني
و تدور حواليك
دي الحب إليك زمني و فني
و حلمي أكون ليك
.
ارسمني
.

معلش

 معلش

.
تيجي أَضَيَّع منك ضحكة قلبك
و اقولك معلش
تيجي أسرسب روحك
و أجرح عمرك
و أجري عليك بالوش
و أمسك لك ورد
و أنا منبت في الأرض الشوك
و أطير بلالين قدامك
و إنت بتتغش
،
تيجي أخونك
و انت وحيد تايه
و أرجع بشرود
و أعيش قدامك بضحك لك
و أنا مش موجود
و أعمل لك من البحر طحينه
و تغرق ف الدود
تستني ف بكره ينجينا
و ترجع مفقود
،
تيجي اقولك أكذب أشعاري
و انام و انا مش ليك
و أصحي استناك و إنت ف وادي
جواري و مماليك
تيجي نبعد علشان صدقني
مش شايفه عينيك
و لا قادره اتحمل انفاسك
و لا لمس إيديك
و لا شايفه العالم بحواسك
و بدوب حواليك
،
تيجي اسيبك
أصل انت سايبني
لسنين قدام
و لا صنت العهد و لا حاببني
و قدرت تنام
و قدرت تعيش عادي كأني
تمثال أوهام
و كسرت اللي بنيته بعمري
و دمع الأيام
تيجي أبدل ليك كل آيامك
و الحب بنار
و تكون زي الغصن بيجري
وسط التيار
لا بيحضن أرض و لا يلاقي
من الرعب فرار
،
تيجي مره ادوقك الدمعه
و أقولك مالك
و أغلط و أنت باجي أقول اسمك
و أنا ندهالك
و تكون علي بالي كتير
و أنا مبجيش علي بالك
،
لا أنا عايزك  تيجي و لا هقولك
ارجعلي و عود
أنا عايزك بس تسير نفس طريقي المسدود
،
تيجي أعمل روحي منيش شايفاك
و إنت بتتهد
و أنسي الأيام الحلوه معاك
و أخلف بالوعد
و أعمل قدام الخلق ملاك
و معاك أسْوَّد
و أندم علي شوق جاب مره هواك
و أبعد و أحتد
تيجي متكلمش معاك كلمه
و أنطق بالرعد