ياما ناس بتلبس شيك
و جوه عِرر
و كلامها ينغز فيك
كإنه الإبر
تاخدك و بتوديك
و كله نِمر
راسمين عليك معاليك
كإنك صور
.......
عوضك علينا يا رب
مش ندمان
كان من نصيبي الحب
و النكران
و شبت قبل ما أشب
م الأحزان
وديت كتير و أديت
ما خدت حنان
..........
تفرش كلامها مداس
و هما فوق
راكبين علي الإحساس
و مش بنفوق
قفلونا بالترباس
و عاملين طوق
قال يعني أنا الوناس
و هما الشوق
......
و مفيش بشر عدلين ؟
يا رب عانيت
ضحيت بنني العين
كتير وفيت
حب و غرام و حنين
و جيت ما لاقيت
جهزت ياما الغدا
و ما اتعشيت
.......
يا رب أنا بتقطف
بقيت دبلان
بفلوسي كنت اتخطف
وحيد فلسان
و عرفتهم و أعترف
أنا زعلان
كله بقي بينصرف
كإني جان
........
