بِتعرّف تخون ؟
بتعرف تخون ؟؟؟
و تعرف تداري كمان العيون ؟؟؟؟
بتقدر تعدّي ؟
و تعرف تداري، و تاخد بيدّي
و وِدّك بودي، و ردّك بردّي
و تهوي الحياه وسط بحر الجنون
بتعرف تخون ؟؟؟
و تنسي و ترجع تفكرني بيك !
و تنده لي لما بغيب عن عينيك
تخاف م الكلام
بس تهوي السكون
و يسري ما بيننا الجفا بالساعات
و يطغي السُكات
عينيك البريئة متعرفش تِكْذِّب
و تِغرّق و تهرب
و يندم عليك الحنين اللي جاي
و الغرام اللي فات
و تسألني روحي كده إذاي يكون ؟
بيعرف يخون !
بتعرف تخون؟؟؟
و دور الضحية أما بسأل يثور
و من دور لدور، و من زور لزور
و من ظن واضح، لدمع السطور
و صبري اللي تايه و داب من سنين
أشوف صبر فين ؟
و أجيب قلب مين ؟
يعلمني تاني لحبّك أصون
، و أصونك تخون.
بتعرف تعيش ؟؟؟
كأن اللي بيني و بينك مفيش
و طيرك تركته بلا أي ريش
وعدته يعيش
و قالك بحبك و غيرك ماليش
تركته بيغرق في نار الظنون
بتعرف تخون ؟؟؟
تغيب أو تعود
كأنك مفيش في الحياه ليك حبيب !
و لا له وجود ! و فين العهود ؟
و فين الأماني و عشق الخلود ؟
و فين الورود ؟
ومين اللي قال من زمان راح يكون،
و هيكون لي كون !
و أصبح يخون
بتعرف تخون ؟؟؟
و تفرح كأنك أمير الزمان
و أحس امتهان، و أحس بجنان
و أحس بمشاعرك و روحك كمان
كأني بشوفك بكل العيون
بترجع تخون
بتعرف تخون ؟؟؟
و تسألني مالك ؟…و أقولّك حاجات.
و أنا م الآهات
بتفتح جروحي ما بين ألف حين
ياخدني الحنين
و لا بقدر و لا بقدر أعند
و برجع أهون، و ترجع تخون
بتعرف تخون ؟؟؟
