مجرد محاوله
.
.
.
.
.
.
بحق الحياه
أو بحق المداوله
بحق القرار
اللي جُــمله و مُجامله
بتنهي الحياه
و إحنا لسّه ما جينا ؟
و تقضي علينا
و إحنا آجنـّه ؟
بإعدامنا و إحنا
مجرد محاوله
=================
ماتقوليش
ماتقوليش يا مصر طابت
كل حاجه
لسّه في قلوبنا شويّه
من السذاجه
لسّه حاسين بالبراءه
و إحنا قدام النصوص
منصوب علينا
بين سطور حكمت علينا
بالبلاده
و انتهينا إننا تايهين
في صفحه
أو مصافحه و يا مبعوث
السماجه
و إحنا قدام النصوص
متنصصين
نص مفتون بالمعالم و
اللي ظاهر
نص مقهور باللي
مدسوس في الديباجه
==================
ليه كده ؟
ليه كده بتهد فيه ؟
كل ما آجي أقوم و أعدي
إنت حارس ...
بس مش حارس عليّه
إنت حارس ...
للي واقف ضد ليــّــه
بعد ما دابت قيودي
جاي ليه تربط إيديه ؟
خدت روحي و لســّه حيّه
مهما هتهد فــ قوايا
مهما طال بيّــه شقايا
مهما هتحاول معايا
واقفه قدامك قويــّــه
===============
دساتر
عساكر دساتر
دساتر عساكر
تعبنا يا ساتر
كفايه علينا عذابنا
اللي ساكن
و ليلنا اللي ساهر
و دم الشهيد اللي كان
دم فاير
و دم الشهيد اللي كان
دم ثاير
تِعب من قلوبكم
يا أهل الدفاتر
في شرع المظالم تتوه
المعالم
تغطوا علي الحق مية ألف
ساتر
============
أشعار / مها ضرار
